Էվերեստի` 5360 մետր բարձրության վրա գտնվող բազային ճամբարը կապահովվի անվճար անլար ինտերնետ կապով

Նեպալի իշխանությունները մտադիր են Էվերեստի` 5360 մետր բարձրության վրա գտնվող բազային ճամբարը ապահովել անվճար անլար ինտերնետ կապով: Այս մասին հաղորդում է ТАСС գործակալությունը` վկայակոչելով տեղի ԶԼՄ-ները:

Պետական հեռուստահաղորդակցական կարգավորիչ մարմնի ներկայացուցչի խոսքով` երկրի իշխանությունները նախատեսում են նաև անվճար ինտերնետ ապահովել դեպի բազային ճամբար տանող ողջ ճանապարհին` սկսած Լուկլա գյուղից:

Բացի այդ, անվճար Wi-fi կհայտնվի 8000 մետր բարձրություն ունեցող Անապուրնա լեռան հարավային բազային ճամբարում, որը գտնվում է 4131 մետր բարձրության վրա:

Աղբյուրի տեղեկացմամբ` ինտերնետ կապի ապահովման համար ցուրտ ջերմաստիճանային պայմաններում դիմացկուն օպտիկամանրաթելային մալուխներ կտեղակայվեն: