ԱՄՆ Ջորջիա նահանգում 11 մարդ է զոհվել

Ամերիկյան Ջորջիա նահանգում տիրող էքստրեմալ եղանակային պայմանների պատճառով առնվազն 11 մարդ է զոհվել, առնվազն 23-ը տուժել են: 

Ինչպես տեղեկացնում է BBC-ն, նահանգի իշխանությունները տորնադոյի նախազգուշացում են հայտարարել, Ջորջիայի հյուսիսային շրջաններում հորդառատ անձրևներ են սպասվում:

Ամերիկյան հեռուստաալիքների հաղորդմամբ` նահանգի տարածքում հանգստյան օրերին 11 տորնադո է գրանցվել:  

Միսիսիպի նահանգում ևս անբարենպաստ եղանակային պայմաններ են գրանցվել շաբաթ օրը: Տորնադոյի հետևանքով 4 մարդ է զոհվել: Քամու արագությունը կազմել է 218 կմ/ժամ:

Տորնադոյի նախազգուշացում է տրվել նաև Ֆլորիդա նահանգում, որտեղ ևս ուժեղ ամպրոպներ են որոտում: