Օբամայի բնակության վերջին օրը Սպիտակ տանը

ԱՄՆ-ի իշխանության ղեկին անցկացրած 8 տարիներն արդեն անցյալում են երկրի նախագահ Բարաք Օբամայի համար, և նա այսօր կանցկացնի Սպիտակ տանն իր բնակության վերջին օրը:

Ինչպես հայտնում է Associated Press-ը, նախագահն այսօր էլ վերջնական կարգադրություն է անում և կապի մեջ է նորընտիր նախագահ Դոնալդ Թրամփի հետ, ում երդմնակալության արարողությունը տեղի կունենա ուրբաթ:

Օբամայի հինգշաբթի օրվա օրակարգը գրեթե ազատ է, մինչդեռ ընտանիքը պատրաստվում է տեղափոխվելուն: Օբամայի օրակարգում ընդգրկված են միայն ամենօրյա ճեպազրույցը լրագրողների հետ և լանչը փոխնախագահ Ջո Բայդենի հետ:

Այսօր կայացվելիք վերջին որոշումներից կլինի համաներում շնորհելու ծրագիրը, որի մասին նա հայտնել էր այս շաբաթ: Ըստ պաշտոնական աղբյուրի` համաներման կարժանանան բռնություն չպարունակող, թմրանյութերի հետ կապված հանցագործությունների մեղադրյալները, որոնք երկար ժամանակ են անցկացրել բանտում: