Օրինակ բերեք, բայց ինձ միլիցա մի’ սարքեք. Կարեն Կարապետյանը վրդովվեց

Այսօր ՀՀ վարչապետ Կարեն Կարապետյանն ամփոփեց իր պաշտոնավարման 100 օրը, որից հետո անդրադարձավ լրագրողների հարցերին: Նրան քաղաքական բնույթի հարցերը դուր չէին գալիս, ինչի մասին նա բացահայտ ասաց:

Էմոցիոնալ պատասխան եղավ նաև բանանի ներկրման վերաբերյալ հարցին, երբ լրագրողները հարցրեցին, թե ինչու բանանի ներկրմանը խոչընդոտողները այդպես էլ անհայտ մնացին ու չպատժվեցին: «Ես չգիտեմ` պատիժ կրե՞լ է, թե՞ ոչ: Ինձ համար դա կարևոր հարց չէ: Ինձ համար կարևոր է, որ էդ տենդենցը, եթե նույնիսկ եղել է, էլ չլինի: Այս պահին կա՞, չկա՞, օրինակ բերեք, բայց ինձ միլիցա մի'  սարքեք, ես իմ ֆունկցիան դրանում չեմ տեսնում»,- ասաց Կարեն Կարապետյանը:

Ասուլիսի ընթացքում տարբեր հարցերի պատասխանելիս վարչապետը մի քանի անգամ ակնարկեց, որ շատերն իրենից ակնկալում են այնպիսի գործառույթներ, որոնք ինքը չունի, չի էլ ցանկանում ունենալ: