Պուտինը համաձայնել է Սիրիայում Ռուսաստանի ռազմական ներկայությունը կրճատել

Ռուսաստանի պաշտպանության նախարարությունը սկսել է կրճատել Սիրիայում ՌԴ զինված ուժերի խմբավորումները՝ նախագահ Վլադիմիր Պուտինի որոշման համաձայն: Այդ մասին հայտնել է գլխավոր շտաբի ղեկավար Վալերի Գերասիմովը, հայտնում է BBC-ի ռուսական ծառայությունը: 
Հակամարտության գոտին առաջինը կլքեն Հյուսիսային նավատորմի ավիակիր խմբի նավերը՝ ռուսական միակ «Ծովակալ Կուզնեցով» ավիակրի գլխավորությամբ:

Պուտինը համաձայնել է Սիրիայում Ռուսաստանի ռազմական ներկայությունը կրճատելու վերաբերյալ պաշտպանության նախարարության առաջարկի հետ դեկտեմբերի 29-ին:

Նույն օրը ռուսական իշխանությունները հայտարարել են, որ սիրիական կառավարությունը և զինված ընդդիմությունը պայմանավորվել են կրակի դադարեցման և խաղաղ բանակցությունների սկսվելու մասին:

Դեկտեմբերի 31-ին ՄԱԿ-ի անվտանգության խորհուրդը միաձայն ընդունել է Ռուսաստանի կազմած բանաձևը՝ ի պաշտպանություն Սիրիայում հրադադարի մասին պայմանավորվածությունների և ընդդիմության հետ Դամասկոսի բանակցությունների մեկնարկի: