Թուրքիայում սեռական բռնության ենթարկված 11-ամյա երեխան մայրացել է

Թուրքիայի Չընար շրջանում 11-ամյա Գ.-ն սեռական բռնության է ենթարկվել: Փորացավից գանգատվելով` հիվանդանոց դիմած երեխան, պարզվել է, հղի է:

Siyasihaber3-ի հաղորդմամբ՝ 11-ամյա երեխան նախորդ ամիս ծննդաբերել է:

Կանանց միություններին հաջողվել է կապ հաստատել  տուժած երեխայի ընտանիքի հետ՝ միջադեպի վերաբերյալ մանրամասներ ձեռք բերելով: Պարզվում է՝ Չընարի գլխավոր դատախազությունը ոչինչ չի ձեռնարկել հանցագործին պատժելու ուղղությամբ:

Կանանց միությունների ներկայացրած տեղեկությունների հիման վրա՝ տուժած երեխան տեղափոխվել է երեխաների պաշտպանության կենտրոն, իսկ նորածինը ոստիկանների կողմից տեղափոխվել է այլ վայր՝ մինչև միջադեպի բացահայտումը:

Նշենք, որ օրեր առաջ Էրդողանի կուսակցության պատգամավորների առաջարկով սկանդալային որոշում էր ընդունվել, համաձայն որի` բռնաբարության ենթարկված կամ ենթարկվող անչափահասը կկարողանա ամուսնանալ իր դեմ սեռական ոտնձգություն իրականացնողի հետ՝ նրան ազատելով քրեական պատասխանատվությունից: Որոշումը երկրում մեծ աղմուկ էր բարձրացրել, դրան հաջորդել էին նաև բողոքի ցույցեր: