Բելառուսը սահմանափակում է ՌԴ-ից մի շարք ապրանքների ներմուծումը

Բելառուսը ՌԴ-ի շուկան հավասարեցրել է արտասահմանյան շուկաներին: Այսուհետև մի շարք ապրանքների հավաստագրումը կվերաբերի նաև ռուսական ընկերություններին: Օրենքը ուժի մեջ կմտնի փետրվարի 1-ից:

Կառավարության որոշումը ստորագրվել է հոկտեմբերին, բայց հասարակությունն այն սկսել է քննարկել միայն այժմ, երբ մատակարարները և արտադրողներն ահազանգ են հնչեցրել. գրում է Независимая газета-ն:

Հաստատվել է ապրանքների ցանկը, որոնց որակը պետք է համապատասխանի բելառուսական շուկայի պահանջներին: Ցանկում ներառված են կենցաղային տեխնիկա (սառնարաններ, հեռուստացույցներ, և այլն), օֆիսային տեխնիկա, ռադիոէլեկտրական սարքերի որոշ տեսակներ: Ցանկում են նաև օղին և գինին, հրդեհային անվտանգության միջոցները, որսորդական և սպորտային զենքը:

Եվրասիական տնտեսական հանձնաժողովն արդեն արձագանքել է նորամուծությանը և նշել, որ Բելառուսի պահանջը խախտում է ինտեգրացիոն պայմանավորվածությունները: