«Ամանորը Նազարի մոտ». Նարեկ Դուրյանի նոր ներկայացումը` փոքրիկներին

Սիրված դերասան, ռեժիսոր Նարեկ Դուրյանը նոր ներկայացում է բեմադրել: Բաղրամյան 3 հասցեում գտնվող «Բոհեմ» թատրոնում Դուրյանը դեկտեմբերի 25-30-ն /այնուհետև հունվարի 4-ից կշարունակի/ օրական մի քանի անգամ կներկայացնի «Ամանորը Նազարի մոտ» մանկական ներկայացումը:

Թատրոնի պրոդյուսեր Քրիստինա Հովհաննիսյանը տեղեկացնում է, որ «Ամանորը Նազարի մոտ» ներկայացման հիմքում հայկական հեքիաթներն են:

«Մեկ ժամ տևողությամբ երաժշտական կատակերգություն է: Ներկայացման երգերի բառերի և երաժշտության հեղինակը Նարեկ Դուրյանն է: Գիտեմ, որ երեխաները շատ են սիրում նրան, նա կարողանում է գրավել փոքրիկներին: Ներառված են ինտերակտիվ հատվածներ: Ներկայացման հերոսները հայկական հեքիաթների կերպարներն են, ունենք նաև Ձմեռ պապ, Ձյունանուշ: Ներկայացումը մի պահ կդադարի. չար կախարդը կգա և կկախարդի հեքիաթի հերոսներին և…»,- պատմեց Հովհաննիսյանը` չբացելով փակագծերը:

Նա տեղեկացրեց նաև, որ ներկայացման մեջ ներգրավված են երիտասարդներ, ովքեր ոչ միայն դերասանությամբ են զբաղվում, այլև գրում են, ջնջում, աշխատում, հսկում, վերանորոգում են և այլն: «Ունիվերսալ վարպետ-դերասաններ ենք պատրաստել, չէ՞ որ թատրոնը միայն դերասանություն անելը չէ»,- ասաց Հովհաննիսյանը: