Դեղերի շուկան կուսումնասիրվի. վարչապետի հանձնարարականը

Այսօր` կառավարության նիստից առաջ, Կարեն Կարապետյանը հանձնարարական հնչեցրեց դեղերի շուկայի վերաբերյալ: Քանի որ կեղծ և անորակ դեղերի շրջանառությունը խանգարում է դեղագործական ճյուղի զարգացմանը և մրցակցային հարաբերություններին, առողջապահության նախարարին հանձնարարվում է երկու շաբաթվա ընթացքում իրականացնել դեղերի շուկայի ուսումնասիրություն, իրավական կարգավորումների վերլուծություն և կառավարության աշխատակազմին ներկայացնել առաջարկություն՝ կցելով անհրաժեշտ գործողությունների ժամանակացույցը:

Բուժհաստատություններում մատուցվող ծառայությունների վերաբերյալ ևս հանձնարարական հնչեցվեց. բուժաշխատող-պացիենտ հարաբերությունների բարեփոխման, հարգանքի և վստահության մթնոլորտ ձևավորելու, իրազեկման մակարդակը բարելավելու նպատակով հանձնարարվում է քսանօրյա ժամկետում մշակել և կառավարության աշխատակազմին ներկայացնել համապատասխան օրենսդրական փոփոխությունների փաթեթ, որով կկարգավորվեն բժշկական էթիկայի նորմերի կիրառման հարցերը:

Նաև հանձնարարվեց ներկայացնել պետպատվեր իրականացնող բուժհաստատությունների բուժաշխատողների անհատական գնահատման համակարգ ներդնելու վերաբերյալ առաջարկություններ, դրա հիման վրա դիտարկել բուժաշխատողների նկատմամբ խրախուսական միջոցներ կիրառելու հնարավորության հարցը: