Թուրքիայում արևմտահայերենով հրատարակվել է Սարոյանի «Թութա՞կ ես, ծօ՛» պատմվածքների ժողովածուն

Կ.Պոլսում (Ստամբուլում) գործող հայկական «Արաս» հրատարակչության կողմից հրատարակվել է  հերթական հայկական գիրքը:

«Գանձասար»-ը տեղեկացնում է, որ  «Արաս»-ն այս անգամ հրատարակել է ամերիկահայ հանրահռչակ գրող Վիլյամ Սարոյանի պատմվածքների հիման վրա կազմված «Թութա՞կ ես, ծօ՛» գիրքը: Արևմտահայերենով հրատարակված ժողովածուի սրբագրմամբ և խմբագրմամբ զբաղվել են Հրակ Փափազյանն ու Սևակ Դեյիրմենջյանը:

Սարոյանի «Թութա՞կ ես, ծօ՛» հատորը կազմվել է դեռևս 1994թ.-ին Բեյրութի «Սիփան» հրատարակչության կողմից հրատարակված «Պատմվածքներ» ժողովածուի երկրորդ հատորի հիման վրա, որն անգլերենից թարգմանել է Հովհաննես Շեոհմելյանը՝ Արամ Սեփեթջյանի խմբագրությամբ:

Հիշեցնենք, որ «Արաս» հրատարակչությունը վերջերս լույս էր ընծայել  նաև հայ գրականության ամենահատկանշական երկերի շարքին պատկանող գործերից մեկը՝ Շահան Շահնուրի «Նահանջ առանց երգի» վեպն ու Անդրանիկ Ծառուկյանի «Մանկություն չունեցող մարդիկ» գրքի թուրքերեն թարգմանությունը: