«Պոբեդա»-ն հրաժարվել է Երևան չվերթերից «Զվարթնոց»-ում թանկ գների պատճառով

«Պոբեդա» ավիաընկերությունը չեղարկել է դեպի Երևան չվերթերը «Զվարթնոց» օդանավակայանում թանկ սպասարկման պատճառով: Այդ մասին հայտնում է  Интерфакс-ը`ավիաընկերությունում իր աղբյուրին հղումով:

«Մենք որոշել ենք հրաժարվել Երևան չվերթերից օդանավակայանում ուղևորների սպասարկման բարձր գների պատճառով։ «Զվարթնոց»-ում այն կազմում է 50 եվրո ամեն ուղևորի համար, ինչն ավելի բարձր է, քան մեր տոմսերի սակագինը»,- ասել է աղբյուրը:

Աղբյուրը հայտնել է, որ «Պոբեդա»-ի հետ համագործակցող այլ օդանավակայաններում մեկ ուղևորի սպասարկման գումարը կազմում է մոտ 10 եվրո, իսկ որոշ օդանավակայաններում սպասարկման գումար ընդհանրապես չկա։

Ընկերությունը Դոնի Ռոստովից Երևան եւ հակառակ ուղղությամբ չվերթեր իրականացնելու թույլտվություն էր ստացել հուլիսին: