Միջազգային մամուլը լայնորեն անդրադարձել է Թուրքիայում ընդդիմադիր թերթի դեմ ոստիկանական գործողությանը

Թուրքիայում ընդդիմադիր Cumhuriyet պարբերականի դեմ դատախազության հրահանգով գործողություններ են իրականացվել, որի շրջանակներում ձերբակալվել են թերթի աշխատակիցներ, այդ թվում՝ գլխավոր խմբագիր Մուրադ Սաբունջուն:

Միջազգային մամուլի անդրադարձը թերթի դեմ տեղի ունեցած ոտնձգությանը չի ուշացել: Գերմանական և ֆրանսիական մամուլում այս տեղեկությունը որպես հրատապ լուր է թողարկվել:

«Ոչ ցանկալի լրագրողների» դեմ թուրք պաշտոնյաների գործողությունները շարունակվում են: Ռեժիմի դեմ գործող թերթի գլխավոր խմբագիրն ու մի շարք աշխատակիցներ ձերբակալվել են»,- գրել է  Frankfurter Allgemeine Zeitung թերթը:

Ձերբակալություններին անդրադարձել են նաև Bild, Zeit, Tagesspiegel թերթերը, սակայն ամենաուշագրավ անդրադարձն արել է ֆրանսիական մամուլը՝ հիշեցնելով, որ ձերբակալվածներն այն թերթի աշխատակիցներ են, որոնք մի ժամանակ հրապարակել էին Թուրքիայից Սիրիա հասցվող զենքերի տեսանյութը:

Միջազգային մի շարք կայքեր այս ձերբակալությունների դրդապատճառներից մեկը համարում են հուլիսի 15-ին Թուքրիայում տեղի ունեցած ռազմական հեղաշրջման փորձը: