Մենք խնդիր ունենք` բացատրելու, որ ցանկացած մարդու քվե կարևոր է. Թևան Պողոսյան

Գյումրիում էլ,  Վանաձորում էլ  առկա են ներքին պրոբլեմներ. այսօր լրագրողներին ասաց ԱԺ «Ժառանգություն» խմբակցության պատգամավոր Թևան Պողոսյանը՝ անդրադառնալով  հատկապես վանաձորյան՝ սկանդալով ուղեկցված ընտրություններին:  Ըստ նրա՝ Վանաձորի և Գյումրու  ՏԻՄ ընտրություններն ապացուցեցին, որ իշխանությունն ապրում է վախերի մեջ: «Իշխանությունը նոր փոփոխությունների մասին է հայտարարում, բայց ամենաշատն ինքն է վախեցած, վախերն այնքան շատ են, որ ընտրություններից մեկ շաբաթ անց օգտագործում են բոլոր ուժային ազդեցությունները»,- ասաց Պողոսյանը:

Նրա խոսքով՝ այն, որ ամենառադիկալ ուժերը քիչ քվեներ ստացան, պայմանավորված է նրանով, որ ընտրողների մասնակցության շեմը բարձր չի եղել: «Ընտրության գնացել են նրանք, ում իշխանությունները կարողացել են տանել: Մենք իսկապես ունենք խնդիր` բացատրելու, որ ցանկացած մարդու ձայն, քվե կարևոր է: Չգնացին, չքվեարկեցին՝ հավատը կորցրած լինելով: Եթե գնային, մասնակցությունն ավելի բարձր կլիներ»,- ասաց Պողոսյանը՝ հավելելով, որ պետք է այս ընտրություններից դասեր քաղել և շարժվել դեպի առաջիկա խորհրդարանական ընտրություններ: