Անդրիաս Ղուկասյանին 4-10 տարվա ազատազրկում է սպառնում

Այսօր ՀՀ վերաքննիչ քրեական դատարանը կքննի «Ոտքի, Հայաստան» նախաձեռնության անդամ Անդրիաս Ղուկասյանին գրավի դիմաց ազատ արձակելը մերժելու դեմ ներկայացված բողոքը: Այս մասին այսօր լրագրողներին ասաց Ղուկասյանի շահերի պաշտպան Կարեն Մեժլումյանը:

Նրա խոսքով՝ քաղաքական գործիչ Անդրիաս Ղուկասյանին առաջադրված մեղադրանքը՝ զանգվածային անկարգություններ կազմակերպել, դատարանի կողմից հաստատվելու պարագայում նրան սպառնում է 4-10 տարվա ազատազրկում: Կարեն Մեժլումյանը, իր պաշտպանյալին առաջադրված մեղադրանքը որակելով «աբսուրդ», հերթական անգամ ընդգծեց, որ նա քաղաքական բանտարկյալ է:

Փաստաբանը հայտնեց, որ Անդրիասի դեմ ցուցմունք տված ոստիկանները հայտնել են, որ իրենք, գտնվելով 40 մ հեռավորության վրա, լսել են, թե ինչպես է Անդրիասը հորդորում երթի մասնակիցներին` իրենց վրա քարեր նետել: Մինչդեռ, ըստ պաշտպանի, իրականում Անդրիասը կողմ է եղել խաղաղ ցույցի և որևէ բախում չի հրահրել ու կազմակերպել:

Նշենք նաև, որ Անդրիաս Ղուկասյանը ՀՔԾ-ում քննվող Սարի թաղի իրադարձությունների ժամանակ ոստիկանների ոչ իրավաչափ գործողությունների փաստով հարուցված քրեական գործով որպես տուժող է ճանաչվել: