«Շախմատը դպրոցում» միջազգային կոնֆերանսը` Ծաղկաձորում

Հոկտեմբերի 1-2 ը Ծաղկաձորում կկայանա «Շախմատը դպրոցում» միջազգային կոնֆերանսը, որը վերաբերում է շախմատային կրթության տեսական և գործնական հիմնահարցերին: Այն կազմակերպում են Հայաստանի շախմատի ակադեմիան և կրթության ու գիտության նախարարությունը։

«Կոնֆերանսին մասնակցելու հայտ են ներկայացրել 23 երկրների ներկայացուցիչներ։ Քննարկման թեմաները լինելու են՝ «Շախմատային կրթություն և անձի զարգացում», «Շախմատի ուսուցման սոցիալ-հոգեբանական հիմնախնդիրները», «Շախմատի ուսուցիչների պատրաստման և վերապատրաստման հիմնախնդիրները», «Շախմատի ուսուցման տեխնոլոգիական և մեթոդական կողմերը», «Շախմատը և ներառական պրակտիկան»,- լրագրողներին հայտնեց Հայաստանի շախմատի ֆեդերացիայի գլխավոր քարտուղար Միքայել Անդրիասյանը։

Հիշեցնենք, որ Հայաստանում այս կոնֆերանսն անցկացվում է արդեն երկրորդ անգամ, առաջին անգամ անցկացվել է 2014 թ.-ին։