ԵՄ նախկին պատգամավորին չի թույլատրվել մուտք գործել Թուրքիա

Թուրքիա-Եվրամիություն խառը խորհրդարանական հանձնաժողովի նախկին համանախագահ` հոլանդացի Յոսթ Յագենդիյքին  չի թույլատրվել մուտք գործել Թուրքիա: ԵՄ խորհրդարանի նախկին անդամը 2009 թվականից ապրում է Թուրքիայում և սյունակ վարում Todays Zaman պարբերականում, որը թուրքական իշխանությունները համարում են գյուլենական լրատվամիջոց. տեղեկացնում է Ermenihaber-ը:

Ըստ թուրքական Ensonhaber լրատվական կայքի`  Թուրքիա մուտք գործելու արգելքը բացատրվում է այն պատճառաբանությամբ, թե Յագենդիյքը Նիդերլանդների թուրքական դեսպանությունից պատշաճ կարգով վիզա չի ստացել: Արդյունքում` վաղը Անկարայի օդանավակայանից նա հետ կուղարկվի Ամստերդամ:

Թուրքական աղբյուրը տեղեկացնում է, որ Todays Zaman-ի սյունակագիրը նաև խորհրդատվություն էր իրականացնում Թուրքիայի Սաբանջը համալսարանին առընթեր գործող Ստամբուլի քաղաքագիտական կենտրոնում: