Գիշերը Արցախում զոհված 19-ամյա զինծառայողի մայրը շուտով լույս աշխարհ կբերի 8-րդ երեխային

Այս գիշեր հակառակորդի կողմից հրադադարի ռեժիմի խախտման արդյունքում ՊԲ հարավային ուղղությամբ տեղակայված զորամասերից մեկի պահպանության տեղամասում մահացու հրազենային վիրավորում ստացած 19-ամյա զինծառայող Արայիկ Օրդուբեկյանը ԼՂՀ Քաշաթաղի շրջանի Սոնասար գյուղից էր: Այս մասին Yerkir.am-ին հայտնեց շրջանի վարչակազմի ղեկավար Սուրեն Խաչատրյանը: Նրա խոսքով` Արայիկը 7 երեխաներից ավագն էր, իսկ մայրն էլ օրերս  էլ լույս աշխարհ բերելու 8-րդ երեխային:

Հիշեցնենք, որ երեկ Արցախի անկախության օրն էր, և որպես կանոն` հակառակորդը հաճախ է ակտիվանում հատկապես Արցախի և Հայաստանի համար տոնական օրերին:

Համաձայն ՊԲ օպերատիվ տվյալների` սեպտեմբերի 2-ի լույս 3-ի գիշերը ղարաբաղա-ադրբեջանական հակամարտ զորքերի շփման գծում հակառակորդի կողմից հրադադարի պահպանման ռեժիմը խախտվել է 30 անգամ, որի ընթացքում տարբեր տրամաչափի հրաձգային զինատեսակներից հայ դիրքապահների ուղղությամբ արձակվել է ավելի քան 600 կրակոց: