«Նաիրիտ»-ը փակելը, վերացնելը որևէ մեկի ցանկությունը չէ. Արծվիկ Մինասյան

«Նաիրիտ»-­ի վերագործարկման վերաբերյալ ցանկացած առաջարկ կառավարության կողմից կարող է քննարկման առարկա դառնալ. լրագրողների հետ զրույցում ասաց ՀՀ էկոնոմիկայի նախարար Արծվիկ Մինասյանը:

«Այդ հարցով լիազոր մարմինն էներգետիկայի և բնական պաշարների նախարարությունն է, բայց մենք էլ պատրաստակամություն ենք հայտնում ցանկացած նման ծրագրերի աջակցություն ցույց տալ: Բնականաբար, եթե լինի նման ցանկություն, միանշանակ քննարկման է ենթակա, որովհետև որևէ մեկի ցանկությունը չէ «Նաիրիտ»-­ը փակելը, վերացնելը, շատ կարևոր է, որպեսզի լուծումը լինի հիմնավոր, տնտեսական տեսանկյունից` արդյունավետ: Ամենակարևորն է, որ մենք կարողանանք մեր տնտեսական հսկային ոտքի կանգնեցնել»,- ասաց նա` հավելելով, որ դա  անհրաժեշտ է` մեր երկրի հետագա արդյունաբերական կողմնորոշումն առավել ամրապնդելու տեսակետից:

«Որքանով տեղյակ եմ, էներգետիկայի նախարարն այս ուղղությամբ անընդհատ աշխատում է, իսկ մենք՝ որպես ներդրողների հետ աշխատող կառույց, պատրաստակամություն ենք հայտնել «Նաիրիտ»-­ը վերագործարկելու ցանկացած առաջարկ քննարկել և մեր ունեցած ներուժի չափով այդ գործընթացին աջակցել»,­- եզրափակեց Մինասյանը: