Նախատեսվում է կրճատել մաքսային ձևակերպումների համար պահանջվող ծախսերը

ՀՀ էկոնոմիկայի նախարար Արծվիկ Մինասյանը կառավարության այսօրվա նիստում ներկայացրեց «Մաքսային կարգավորման մասին» Հայաստանի Հանրապետության օրենքում փոփոխություն և լրացումներ կատարելու մասին» Հայաստանի Հանրապետության օրենքի նախագիծը:

Նախարարը նշեց, որ օրենքում լրացում կատարելը պայմանավորված է փոքր և միջին ձեռնարկատիրական գործունեության իրականացման ընթացքում ապրանքների ներմուծման և արտահանման գործընթացները պարզեցնելու անհրաժեշտությամբ: Նշված խնդիրը ներկայացվել է ՓՄՁ զարգացման խորհրդի նիստին, որի ժամանակ ներկայացվել է խնդիրը և հաստատվել խնդրի լուծման անհրաժեշտությունը:

Նախագծով առաջարկվող լրացումն ուղղված է մաքսային ձևակերպումների գործընթացի պարզեցմանը և դյուրացմանը, ինչպես նաև դրա համար պահանջվող ժամանակի և ծախսերի կրճատմանը:

Կառավարությունը հավանություն տվեց ներայացված օրենքի նախագծին և այն ուղարկեց Ազգային ժողով: