Եթե դա մինիստրներին ա վերաբերում, ոչինչ. ՀՀԿ-ական պատգամավորը՝ սոցփաթեթների հանգստի բաղադրիչի ֆինանսավորումը կասեցնելու մասին

Այսօր կառավարության նիստում վարչապետ Հովիկ Աբրահամյանը հայտարարեց, որ սոցիալական ծառայությունների մատուցման ոլորտում առկա չարաշահումների պատճառով ժամանակավորապես կասեցնում են սոցփաթեթներում հանգստի բաղադրիչը, մինչև կարողանան լուծել բոլոր խնդիրները:

ԱԺ սոցիալական հարցերի հանձնաժողովի անդամ, ԱԺ ՀՀԿ խմբակցության պատգամավոր Վրեժ Մարկոսյանը Yerkir.am-ի հետ զրույցում նշեց. «Եթե դա մինիստրներին ա վերաբերում, ոչինչ, թող չգնան` հանգստանալու, կամ էլ իրենց հաշվին թող գնան»:

Երբ հայտնեցինք, որ դա վերաբերում է պետական քաղծառայողներին, ուսուցիչներին, պատգամավորն ասաց. «Եթե խոսքը վերաբերում է ուսուցիչներին, ես դա սխալ եմ համարում, սովորական քաղծառայողները պետք է շարունակեն օգտվել հանգստի իրենց իրավունքից»:

Նա հույս հայտնեց, որ իրավապահ մարմինները, ի վերջո, կկարողանան գտնել չարաշահողներին և լուծել այդ հարցը: Բայց թե ո՞րն է կառավարության այդ որոշման տրամաբանությունը, պատգամավորը չկարողացավ ասել: