Ո՞վ է այդ մարդը. ՀՀԿ խմբակցության ղեկավարը չի ճանաչում ՀՀԿ-ական գյուղապետին

Yerkir.am-ը տեղեկացրել էր, որ Արարատի մարզի Նորաշենի գյուղապետ` ՀՀԿ-ական Արտուշ Սարգսյանը ապամոնտաժել է գյուղապետարանի բակում կանգեցված` Նժդեհի արձանը` պատճառաբանելով, որ իրեն խանգարում է` ամեն անգամ գործի գնալիս «կպնում է» գլխին:

Փորձեցինք ՀՀԿ խմբակցության ղեկավար Վահրամ Բաղդասարյանից ճշտել իրենց կուսակցության վերաբերմունքը կատարվածին: Բայց նա ասաց, որ ինքը չի ճանաչում նման մարդու, խնդրին տեղյակ չէ և չի կարող կարծիք հայտնել: «Ո՞վ է այդ մարդը, պատգամավո՞ր է, որ ճանաչեմ ու կարծիք հայտնեմ»,- ասաց Բաղդասարյանը:

Ի պատասխան մեր դիտարկմանը, թե գյուղապետն իրենց կուսակցության անդամ է, նա խորհուրդ տվեց դիմել պատկան մարմիններին:

Փաստորեն, Հանրապետական խմբակցության ղեկավարները չեն ճանաչում հանրապետական գյուղապետերին և չեն տիրապետում ինֆորմացիայի, թե ինչ է կատարվում այն գյուղերում, որտեղ իրենց անդամները գյուղապետեր են: