Ազատ գետի ծրագրի այլընտրանքային քննարկումներ իրականացնելու հանձնարարական է տրվել

Գառնիի ծրագիրը  բոլոր անհրաժեշտ ընթացակարգերն անցել է և ստացել շինթույլտվություն. խորհրդարանում լրագրողների հետ զրույցում ասաց ՀՀ  ջրային տնտեսության պետական կոմիտեի նախագահ Արամ Հարությունյանը՝ հավելելով, որ կա վարչապետի հանձնարարական, որպեսզի բանակցեն Համաշխարհային բանկի հետ՝ այլընտրանքային լուծումներ գտնելու համար:

«Այսօրվա դրությամբ մենք ունենք հանձնարարական` այլընտրանքային քննարկումներ իրականացնել դոնոր կազմակերպության հետ, ինչին էլ մենք ձեռնամուխ ենք եղել: Այսօրվա դրությամբ մենք գտնվում ենք քննարկման փուլում: Հենց քննարկումներն ավարտեցինք, պատրաստ ենք տեղեկատվություն տրամադրել: Այն աշխատանքները, ծրագրի այն մասերը, որոնք մինչև այսօր իրականացվել են, դրանք անտեղի չեն կորչելու, և եթե այս պահի դրությամբ դեռևս վերջնական համաձայնություն, պայմանավորվածություն չունենք, դժվար է հիմա կանխատեսել` ինչ կլինի»,- ասաց Հարությունյանը: