ԱՄՆ-ում ձերբակալված ադրբեջանցի գործարարը Էրդողանի կնոջ հիմնադրամին 2,5 միլիոն դոլար «նվիրատվություն» է արել

Թուրքիայում դեկտեմբերի 17-ի «Մեծ կաշառք» հակակոռուպցիոն գործողության ժամանակ ձերբակալված, այնուհետև ազատ արձակված` իրանական ծագումով ադրբեջանցի գործարար Ռեզա Զարրաբը մարտի 19-ին ձերբակալվել էր ԱՄՆ-ում:

Հիշեցնենք, որ Զարրաբի, Էրդողանի ընտանիքի ու Թուրքիայի մի շարք ղեկավարների անունները հայտնվել էին «Մեծ կաշառք» գործողություն ցուցակում: Զարրաբը և ձերբակալվածները կարճ ժամանակ անց ազատ էին արձակվել:

Նոր մանրամասներ են ի հայտ եկել Զարրաբի ձերբակալության մասին: Հայտնի է դարձել, որ նա իր` գործարար լինելն ապացուցելու համար ամերիկյան դատարանում, որպես արդարացում, ներկայացրած ցուցմունքում նշել է, որ ինքը 150 անգամ «նվիրատվություն է արել Թուրքիայի նախագահ Ռեջեփ Թայիփ Էրդողանի կնոջ` Էմինե Էրդողանի Togem-Der հիմնադրամին»: «Նվիրատվություններ»-ի ընդհանուր գումարը կազմել է 2,5 միլիոն ԱՄՆ դոլար:  

Հիմնադրամի կայքի` բարեգործների բաժնում Զարրաբի անունը, սակայն, չի հայտնաբերվել:

Ուշագրավն այն է, որ Զարրաբի` հիմնադրամին արած «նվիրատվությունների» մասին լուրերի հրապարակումից անմիջապես հետո հիմնադրամը փակել է իր պաշտոնական կայքէջը: