Նկարիչների միությունը նկարների վաճառքից 8000 դոլար է արդեն հավաքել Արցախի համար

Հայաստանի նկարիչների միությունը կազմակերպել էր ցուցահանդես-վաճառք, որից գոյացած հասույթը պետք է փոխանցվեր Արցախին: Yerkir.am-ի հետ զրույցում միության նախագահ Կարեն Աղամյանը նշեց, որ ցուցահանդեսը գործել է 10 օր, ցուցադրվել են միության պահոցներում գտնվող` 1960-80 թվականների ստեղծագործողների 80 լավագույն աշխատանքներ:

«Ցուցահանդես-վաճառքի օրերին գնել են 8 նկար և վաճառքից գոյացել է 8000 դոլար: Ի դեպ, նկարներն իրենց արժեքից բավական ցածր գնով էին դրվել, որպեսզի շատ աշխատանքներ գնեն: Ճիշտ է, կուզեինք` ավելի շատ վաճառվեր, բայց ունենք այն, ինչ ունենք»,- ասաց նա:

Աղամյանը նշեց, որ հավաքված գումարը դեռ չեն փոխանցել, քանի որ կան մարդիկ, որոնք ցանկություն են հայտնել 1-2 նկար էլ գնել: «Ճիշտ է, նկարները չեն ցուցադրվում, բայց մենք հայտարարություն կտարածենք, որ ցանկացողները կարող են գալ և մեր պահոցներում էլ նայել դրանք ու ընտրել»,- ասաց նա: