Մեր դիրքերն էսքան լավն են, որովհետև Մոնթեի գծած դիրքերն են. կրտսեր սերժանտ Առաքելյան

Razm.info-ի թղթակիցը  եղել է Արցախի պաշտպանության բանակի արևելյան ուղղությամբ տեղակայված մարտական դիրքերում և զրուցել զինծառայողների հետ։ Պատմություններ առաջնագծից՝ թիկունքի համար։

Կրտսեր սերժանտ Արթուր Առաքելյանը մասնագիտությամբ կապավոր է: Ծառայության ավարտին մնացել է մոտ կես տարի: Արթուրը Արմավիրի մարզից է, ՝ Էջմիածին քաղաքից:

Արթուրի հետ զրույցը զորամասի մասին լրագրողը  հարցով է սկսում՝ «Գիտե՞ս՝ ում ստեղծած…»։ Չի թողնում շարունակել. «Գիտեմ, Ավոյի»:

Ասում է՝ բոլորը գիտեն նրան, այստեղ բոլորի համար է օրինակ Մոնթեն:
«Ի դեպ, մեր դիրքերն էսքան լավն են, որովհետև Մոնթեի գծած դիրքերն են», — ասում է նա:

Արթուրը պատմում է, թե ինչքան ոգևորված են իրենց կողքին 90-ականների պատերազմում կռված ազատամարտիկների տեսնելուց: «Անկախ քեզնից ավելի ուժեղ ես քեզ զգում: Ավելի պարտավորված իրենց ու քո առաջ: Իրենց հետ դիրք պահելն ուրիշ բան է»:

«Գիտեմ, որ թիկունքում մեր մասին շատ են մտածում: Ուզում եմ, որ չանհանգստանան, մենք լավ ենք: Ասեք, թող էդքան համով ու քաղցր բաներ չուղարկեն, էնքան ուղակել եք, էլ չենք ուտում»