Վարչապետն ընդունել է ջրամատակարարման ոլորտում գործունեություն ծավալող գերմանական ընկերությունների ղեկավարներին

Վարչապետ Հովիկ Աբրահամյանն ընդունել է ջրամատակարարման ոլորտում գործունեություն ծավալող գերմանական «Ռեմոնդիս Ակվա», «Թիլիա» և «Դեկոն Ինթերնեյշնլ» ընկերությունների ղեկավարներին: 

Զրուցակիցները քննարկել են ջրամատակարարման ոլորտում հնարավոր համագործակցությանը վերաբերող հարցեր: Ընկերությունների ղեկավարները նշել են, որ շահագրգռված են Հայաստանում գործունեություն ծավալելու և այդ ոլորտում ունեցած մեծ փորձը մեր երկրում ներդնելու հարցում: 

Վարչապետ Աբրահամյանը ողջունել է նրանց նախաձեռնությունը և նշել, որ ջրամատակարարման ոլորտը ՀՀ կառավարության համար ունի մեծ կարևորություն: Գործադիրի ղեկավարն ընդգծել է, որ այդ նպատակով վերջին տարիներին հետևողական քայլեր են իրականացվել Երևանի, մարզերի ջրամատակարարման ու ջրահեռացման աշխատանքների բարելավման նպատակով և կարևորել ջրային կառավարման ոլորտում արդյունավետության բարձրացումը: