Արցախ կամավորներ են գնացել Ֆրանսիայից, Լիբանանից, ՌԴ-ից

Արցախի Ազատամարտիկների միության շենքի դիմաց առավոտից շարունակվում է կամավորների անդամագրումը։ Արցախից  Yerkir.am-ի լրագրողը հայտնում է, որ Ազատամարտիկների միության նախագահն այս պահին դիրքերում է, և կամավորների անդամագրման գործընթացը համակարգում է Միության աշխատակազմի ղեկավար, ազատամարտիկ Էդուարդ Խաչատրյանը։

Նա մեր թղթակցի հետ զրույցում պատմեց, որ, ապրիլի 2-ից սկսած, հազարավոր կամավորներ են գալիս, այդ թվում` կանայք։ Նրա խոսքով` կամավորներ են եկել նաև արտասահմանից՝ ՌԴ-ից, Ֆրանսիայից, Լիբանանից։

Անդրադառնալով երեկ Մարտակերտի ճանապարհին հակառակորդի անօդաչու սարքի կողմից պայթեցված ավտոբուսի մեջ գտնվող` Սիսիանի ջոկատի անդամներին` Խաչատրյանը նշեց. «Շատ բարձր տրամադրություն ունեին, գյուղապետեր էլ կային, բայց այստեղ՝ Արցախում բոլորը՝ նախարար, մարզպետ, գյուղապետ, թե` բանվոր, հավասար են: Մարտի դաշտ գնալուց առաջ բոլորն էլ գիտակցում են, որ կարող է նաև զոհեր լինեն»:

Ազատամարտիկը տեղեկացրեց, որ Սիսիանի ջոկատն ուղևորվում էր հյուսիսարևելյան ուղղությամբ տեղակայված դիրքեր: