Լրացուցիչ գումար չենք կարող հատկացնել. Հովիկ Աբրահամյանը՝ տրանսպորտի փոխնախարարին

Այսօր կառավարության նիստում տրանսպորտի և կապի փոխնախարար Արթուր Առաքելյանը ներկայացրեց որոշում, որով առաջարկվում է պետբյուջեում կատարել վերաբաշխում, և 6 միլիոն 276 հազար դրամ ուղղել «Երկաթուղու շինարարություն» ՓԲԸ-ին` որպես սուբսիդիայի հավելում: Որոշումը պայմանավորված է նրանով, որ, հարավային երկաթուղու կառուցման ծրագրերի հետ կապված, Իրանի գործընկերները ակտիվացել են, և անհրաժեշտություն է առաջացել վերաբաշխում կատարել:

Վարչապետ Հովիկ Աբրահամյանը դիմեց փոխնախարար Արթուր Առաքելյանին: «Պարո\'ն Առաքելյան, մի հատ ուշադրություն դարձրեք` Գորիս-Կապան ճանապարհը շատ անմխիթար վիճակում է գտնվում: Նախարարն, իհարկե, մեզ զեկուցել է, և մտածեք, որ ձեր նախարարության անցկացրած մրցույթներից տնտեսած գումարները ուղղեք այդ վերանորոգումները ավարտելուն: Դա շատ արագ պետք է անել, հենց եղանակը տաքանա: Գիտեմ, որ տրանսպորտի նախարարը 238 միլիոն դրամ փող է դնում, բայց այդ գումարը ձեր տնտեսած գումարներից պետք է ուղղեք, մենք որևէ լրացուցիչ գումար չենք կարող հատկացնել»,- ասաց նա: