Սերժ Սարգսյանի եւ Հունաստանի վարչապետի հայտարարությունները կատաղեցրել են Թուրքիային

Թուրքիայի ԱԳՆ մամուլի խոսնակ Թանժու Բիլգիչը հայտարարություն է տարածել՝ Հայաստանին և Հունաստանին խիստ քննադատելով:

Բիլգիչն անհանգստություն է հայտնել այն կապակցությամբ, որ Հունաստան այցելած` Հայաստանի նախագահ Սերժ Սարգսյանի հետ հանդիպումներում Հունաստանի վարչապետ Ալեքսիս Ցիպրասն ու նախագահ Պրոկոպիս Պավլուպուլոսը քննադատել են Թուրքիային Հայոց ցեղասպանությունը հերքելու համար:

Աղավաղելով ՀՀ նախագահ Սերժ Սարգսյանի հայտարարությունները Աթենքում՝ Բիլգիչը գրավոր պատասխան է հղել ՀՀ նախագահի` Ցեղասպանության վերաբերյալ հայտարարություններին`  նշելով, թե դարասկզբին՝ «Օսմանյան կայսրության անկման ժամանակ, տեղի ունեցած պատմական որոշ իրադարձությունների» մասին է խոսքը:

«Հայաստանի և Հունաստանի հայտարարություններն ապացուցում են, որ նրանց հարաբերությունները թուրքական ինքնության դեմ քարոզչության վրա հիմնված հիվանդ մտածելակերպի արդյունք են»,- հայտարարել է ԱԳՆ խոսնակը՝  ճոխ հայտարարություններով հերթական անգամ հերքելով Հայոց ցեղասպանության փաստը: