Անվճար բժշկական օգնություն և սպասարկում կտրամադրվի հիվանդության պատճառով զորացրված, սակայն հաշմանդամ չճանաչված անձանց

Այսօր կառավարության նիստում աշխատանքի և սոցիալական հարցերի նախարար Արտեմ Ասատրյանը ներկայացրեց որոշման փոփոխություն: Նախարարը նշեց, որ զինվորական ծառայության ընթացքում ստացած խեղման, վնասվածքի ու հիվանդության պատճառով զորացրված անձինք, ովքեր բժշկա-սոցիալական փորձաքննության արդյունքում հաշմանդամ չէին ճանաչվում, գործող օրենսդրության համաձայն չէին օգտվում պետությունից երաշխավորված անվճար ու արտոնյալ պայմաններում բժշկական օգնությունից և սպասարկումից: Սա պայմանավորված էր այն հանգամանքով, որ զորացրման պատճառները համապատասխանում էին ԲՍՓ  չափորոշիչներին, որոնցով հաշմանդամ էին ճանաչվում:

«Այս վիճակը դժգոհություն էր առաջացրել այդ անձանց շրջանում, ովքեր հիվանդության, խեղման կամ վնասվածքի պատճառով զորացրվել են, բայց չեն կարողանում օգտվել այդ բժշկական օգնությունից, և նախագծով առաջարկվում է, որ այն անձինք, ովքեր ԲՍՓ արդյունքում հաշմանդամ չեն ճանաչվել, իրավասու մարմինների կողմից կազմված վերականգնողական ծրագրերի շրջանակներում նրանց տրամադրվի անվճար բժշկական օգնություն և սպասարկում: Մեր գնահատմամբ` տարեկան շուրջ 70-80 անձ կարող է օգտվել այս ծրագրից»,- ասաց Արտեմ Ասատրյանը: