«Ալաշկերտ»-ը հաղթել է լիտվական թիմին

Հայտնել էինք, որ Անթալիայում ուսումնամարզական հավաք անցկացնող` Երևանի «Ալաշկերտ»-ի վերջին ստուգողական հանդիպումը չէր կայացել եղանակային անբարենպաստ պայմանների պատճառով: Ինչպես հայտնում է երևանյան ակումբի մամուլի ծառայությունը, եղանակն, այնուամենայնիվ, բարեհաճ  է գտնվել, և «Ալաշկերտ»-ի ու «Սուդուվա»-ի ստուգողական խաղը կայացել է:

Խաշմանյանի թիմի մրցակիցը Լիտվայի «A» Լիգայի առաջատարներից է և բավական հաջող սկսեց խաղը: Արդեն 17-րդ րոպեին լիտվացիները բացեցին խաղի հաշիվը: Սակայն հետագայում դաշտում տնօրինում էին «Ալաշկերտ»-ի ֆուտբոլիստները, և իրենց խոսքն ասացին թիմի ռմբարկուները՝ Հեբեր Արաուխոն և Միհրան Մանասյանը, ովքեր վտանգավոր հարվածներ կատարեցին: Արդյունքում` Հեբերն ու Միհրանը մեկական գոլ հեղինակեցին, և «Ալաշկերտ»-ը հաղթեց 2:1 հաշվով: Նշենք, որ Միհրան Մանասյանն իր գոլը խփեց 11 մետրանոց հարվածով, որն ինքն էր վաստակել: