Թուրքիան ու ԻՊ-ը գաղտնի բանակցություններ են վարում. Լավրով

Թուրքիան ու «Իսլամական պետություն»-ը գաղտնի բանակցություններ են վարում, քննարկում մաքսանենգ մատակարարումների նոր տարբերակներ: Այս մասին հայտարարել է Ռուսաստանի արտգործնախարար Սերգեյ Լավրովը Московский комсомолец-ին տված հարցազրույցում:

«Թուրքիայի կողմից շարունակվում են խոսակցությունները սիրիական տարածքում  անվտանգության գոտի ստեղծելու մասին, որը ազատ կլինի ԻՊ-ից: Բոլորն են հասկանում, որ խոսքը երկու քրդական անկլավների սահմանի միջև ընկած հատվածի մասին է: Քրդական ուժերի միավորումը Թուրքիան համարում է իր համար բացարձակ անընդունելի գոնե այն պատճառով, որ դա կխանգարի Թուրքիային` կապ հաստատել Սիրիայի զինյալների հետ ու նրանցից ստանալ մաքսանենգ մատակարարումներ»,- ասել է ՌԴ ԱԳՆ ղեկավարը:

«Կան տեղեկություններ այն մասին, որ ԴԱԻՇ-ի ղեկավարությունը շարունակում է գաղտնի շփումները թուրքական ղեկավարության հետ: Նրանք քննարկում են գործողությունների տարբերակներ ներկայիս պայմաններում, երբ մեր ռազմատիեզերական ուժերի հարվածներով մաքսանենգության ավանդական երթուղիները լրջորեն սահմանափակվել են»,- ասել է Լավրովը: