Զիկա վիրուսի հարցը` ԱԺ-ում. նախարարը հանգստացրեց բոլորին

Այսօր կառավարության հետ հարցուպատասխանի ժամանակ ՕԵԿ-ական պատգամավոր Հովհաննես Մարգարյանը հարց ուղղեց առողջապահության նախարարին Զիկա վիրուսի մասին: Հիշեցնենք, որ այդ վիրուսը տարածված է Հարավային Ամերիկայում, վտանգավոր է հատկապես հղիների համար` նորածինները փոքր գլխով են ծնվում և հիմնականում չեն ապրում:

«Կարկուտը ծեծած տեղն է ծեծում: Հիմա էլ խոսում են ինչ-որ մոծակների մասին: Այդ վիրուսը լուրջ մտահոգություն է առաջացնում, Աստված մի արասցե` այդ մոծակները տարածվեն այստեղ»,- ասաց պատգամավորը:

Առողջապահության նախարար Արմեն Մուրադյանը պատասխանեց, որ անհանգստանալու կարիք չկա, որովհետև նման տեսակի մոծակները Հայաստանում չկան բնակլիմայական պատճառներով, և  Հայաստանում այդ վիրուսի տարածման հավանականությունը շատ փոքր է:

«Վտանգը հղիներին է հիմնականում վերաբերում, ուստի մեկնել այդ երկրներ հղիներին խորհուրդ չենք տալիս»,- ասաց նախարարը: