Քամիներ են, վառարանները չեն հասցնում տաքացնել. Արմավիրի 10 դպրոցներում դասերը կսկսվեն հաջորդ շաբաթվանից

Տեղեկացրել էինք, որ այսօր ԿԳՆ հանրակրթության վարչության պետ Նարինե Հովհաննիսյանը լրագրողներին հայտնել էր, որ Արմավիրի 10 դպրոցներում դասերը չեն վերսկսվել:

Yerkir.am-ի հետ զրույցում Արմավիրի կրթության, մշակույթի և սպորտի վարչության պետ Գայանե Սայադյանը նշեց, որ խնդիրն այն է, որ հեղուկ վառելիքով են այդ դպրոցները ջեռուցվում, և անհրաժեշտ ջերմաստիճանը չեն կարողանա ապահովել:

«Հիմա մեզ մոտ քամիներ են, և այս եղանակին վառարաններն ուղղակի չեն հասցնում տաքացնել դասարանները: Այսպես, թե այնպես այդ դպրոցներում մենք միշտ խնդիր ունեցել ենք, բայց հիմա` այս շնչառական վարակների հետ կապված, որոշեցինք ռիսկի չդիմել և գոնե մեկ շաբաթ էլ հետաձգել դասերը»,- ասաց նա:

Սայադյանը նշեց նաև, որ բաց թողնված դասերը կլրացնեն ինչպես մյուս բոլոր դպրոցները` գարնանային արձակուրդների և հավելյալ դասաժամերի հաշվին: Ըստ նրա` հիմնականում սահմանամերձ համայնքների` Բագարան, Երվանդաշատ, դպրոցներն են այդ տասը դպրոցների թվում: