Հանցավոր խմբի գործով կալանավորված հաղորդավարուհին ազատ արձակվեց

2015 թվականի նոյեմբերի 25-ին Նորքում ԱԱԾ-ի կողմից վնասազերծված «հանցավոր» խմբի գործով կալանավորված` 30-ամյա Լիլիթ Թորոսյանն  ազատ է արձակվել: Այս տեղեկությունը Yerkir.am-ի հետ զրույցում հաստատեց նրա պաշտպան Գեղամ Հակոբյանը՝ նշելով, որ իր պաշտպանյալի նկատմամբ խափանման միջոց է ընտրվել ստորագրությունը չհեռանալու մասին:

Նշենք որ Լիլիթ Թորոսյանը «Մարիամ» ռադիոկայանի Գյումրու մասնաճյուղի աշխատանքները համակարգողն է: Նա այն լրագրողն է, ով հարցազրույցներ էր ունեցել Արթուր Վարդանյանի հետ:

ՀՀ ԱԱԾ քննչական վարչությունում է քննվում ՀՀ քրեական օրենսգրքի 223-րդ հոդվածի 1-ի և 2-րդ մասերով և 235–րդ հոդվածի 3-րդ մասով հարուցված քրեական գործը:

Օրեր առաջ նախաքննական մարմնի միջնորդությամբ երկարաձգվել էր խմբի հիմնական անդամների կալանքի ժամկետը, իսկ շաբաթներ առաջ էլ այս գործով ձերբակալվել, ապա նաև կալանավորվել էին ազատամարտիկ Վոլոդյա Առաքելյանը և «Հայրենիք և պատիվ» կուսակցության նախագահ Գառնիկ Մարգարյանը: