Վախենում էին` ակտիվիստները կրկին կխոչընդոտեն, դրա համար էլ Արամի 30-ի շենքը քանդեցին կեսգիշերին

Արամի 30-ը և դրան հարող տարածքները դեռևս 2004-ին` Երևանի նախկին քաղաքապետ Երվանդ Զախարյանի օրոք, գերակա շահ էին համարվել. լրագրողներին հայտնեց այդ տարածքում հյուրանոցային համալիր կառուցողը` Ավետիս Կարագուլյանը:

Ըստ նրա` հենց այդ ժամանակ է ամբողջ նախագիծը մշակված եղել` թե տարածքում ինչը պետք է քանդվի, ինչը` ոչ:

Կարագուլյանի հավաստմամբ` ինքը չի իմացել, որ Արամի 30 հասցեում գտնվող շենքը հուշարձան է:

Yerkir.am-ի հարցին, թե ժամանակին, երբ ստեղծվեց «Արամի 30» հասարակական շարժումը և բազում քաղաքացիներ բողոքի ակցիա էին անում շենքի պահպանման համար, այդ ժամանակ է՞լ չի իմացել, որ շենքն արժեք է Երևանի, երևանցիների համար, Կարագուլյանը խուսափողաբար պատասխանեց. «Խնդիրն ինձնով չի սկսվում և ինձնով վերջանում»:

Հաջորդ հարցին` եթե չգիտեր, որ հուշարձան է, ինչո՞ւ կեսգիշերին քանդեցին Արամի 30 հասցեում գտնվող շենքը, Կարագուլյանն անկեղծ պատասխանեց, թե վախենում էին, որ ակտիվիստները դարձյալ կխոչընդոտեին:

Ի դեպ, տարածքը կառուցապատելու համար գործարարը հատկացրել է 500 000 դոլար: