3 օր առաջ վրաերթի ենթարկված 14-ամյա աղջիկը դեռ գիտակցության չի եկել

Տեղեկացրել ենք, որ հունվարի 11-ին  անհայտ մակնիշի և համարանիշով ավտոմեքենայի վարորդը Բագրատունյաց փողոցում` Երևանյան լճի կամրջին, վրաերթի է ենթարկել հետիոտն` Արմավիր քաղաքի բնակիչ, 14-ամյա Շուշանիկ Իսպիրյանին: Վարորդը, երեխային թողնելով անօգնական, դեպքի վայրից դիմել է փախուստի: Վրաերթի ենթարկվածը ծայրահեղ ծանր վիճակում տեղափոխվել է «Սուրբ Աստվածամայր» բժշկական կենտրոն:

Հիվանդանոցի մանկական վերակենդանացման բաժնի վարիչ Աննա Չոբանյանը yerkir.am-ի հետ զրույցում հայտնեց, որ աղջկա վիճակը շարունակում է մնալ ծայրահեղ ծանր: «Նրա առողջական վիճակում որևէ փոփոխություն չի եղել` միացված է արհեստական շնչառության սարքին, գիտակցության դեռ չի եկել»,- ասաց նա:

Հիշեցնենք, որ հիվանդանոցի տնօրեն Նիկոլայ Դալլաքյանը տեղեկացրել էր, որ աղջիկն ուղեղի ծանր վնասվածքներ է ստացել, նրան վիրահատել էին, ներգանգային տվիչ տեղադրել: