Սաղմոսավանում մշակույթի կենտրոն կառուցելու նպատակով Հայ Առաքելական եկեղեցուն հողամաս կտրամադրվի

Կառավարության  այս շաբաթվա նիստի օրակարգում է ընդգրկված որոշում` Արագածոտնի մարզի Սաղմոսավան համայնքում գտնվող 0.508 հա` պետական սեփականության հանդիսացող` բնակավայրերի նպատակային նշանակության հողամասից 0.4 հա հողամասը, համաձայն հավելվածի, սեփականության իրավունքով անհատույց տրամադրել Հայաստանյայց Առաքելական Սուրբ Եկեղեցուն (Մայր Աթոռ Սուրբ Էջմիածնին)` Սաղմոսավան համայնքում մշակույթի կենտրոն կառուցելու նպատակով:

ՀՀ կառավարության որոշման նախագծի  անհրաժեշտությունը պայմանավորված է այն հանգամանքով, որ նշված տարածքը չի օգտագործվում (դատարկ), համայնքը  մշակույթի կենտրոն չունի, և Հայաստանյայց Առաքելական Սուրբ Եկեղեցին պատրաստակամություն է հայտնել ՀՀ Արագածոտնի մարզի Սաղմոսավան համայնքի վարչական սահմաններում գտնվող  0.4 հա տարածքը եկեղեցուն հանձնելու դեպքում կառուցել մշակույթի կենտրոն:

ՀՀ կառավարության որոշման նախագծի ընդունմամբ համայնքը կունենա մշակութային կենտրոն: