Կանչերի թիվն այնքան շատ էր, որ ուղղակի չէինք կարող չուշանալ. Թագուհի Ստեփանյան

Արդեն տեղեկացրել ենք, որ տոնական օրերին շտապօգնությունը գերլարված է աշխատել: Այսօր «Շտապբուժօգնություն» ՓԲԸ-ի տնօրեն Թագուհի Ստեփանյանը լրագրողներին հայտնեց, որ ժամում մոտավորապես 50-60 զանգ են սպասարկել, ուստի եղել են դեպքեր, երբ ուշացել են:

«Մենք ուղղակի չէինք կարող չուշանալ, երբ կանչերի թիվն այդքան մեծ էր: Մենք ուշացման դեպքում մարդկանց զգուշացնում էինք, որ կան ավելի շտապ կանչեր, ասենք` սրտանոթային հիվանդությունների դեպքում, և խնդրում էինք մի փոքր սպասել, սակայն այդ ընթացքում մենք հեռախոսով սպասարկում էինք` մինչև մեքենան կհասներ»,- ասաց Ստեփանյանը:

Նա նշեց նաև, որ սուր շնչառական հիվանդությունների ժամանակ շտապօգնություն պետք է զանգահարել այն դեպքում, երբ հիվանդի ջերմությունը 38-ից բարձր է, շնչառության հետ կապված լուրջ խնդիրներ ունի: «Հիվանդի մոտ պետք է լինի նաև այն վիճակը, որ նա համաձայնի հիվանդանոց տեղափոխվել»,- ասաց Ստեփանյանը: