Խզմալյանի հերթական հարցազրույցը ադրբեջանական կայքին

Կինոռեժիսոր, հասարակական գործիչ Տիգրան Խզմալյանը հերթական սկանդալային հարցազրույցն է տվել ադրբեջանական haqqin.az -ին։ Այս անգամ թեման դեկտեմբերի 6-ին կայացած հանրաքվեն էր։

Խզմալյանն իր հարցազրույցում նշել է, որ հանրաքվեի արդյունքները կեղծվել են, և այն ամենը ինչը կատարվել է դեկտեմբերի 6-ի ցերեկը և գիշերը, ևս մեկ քայլ է դեպի ԽԱՀՄ ամենավատ ավանդույթների վերադարձը։

Նա նշել է, որ կեղծումները համակարգվել են ոչ միայն հայկական իշխանությունների, այլև հատուկ Երևան գործուղված` ՌԴ ԿԸՀ նախագահ Չուրովի կողմից։ «Այդպիսի նշանակություն է տալիս Կրեմլը Սերժ Սարգսյանի ռեժիմի պահպանմանը»,- կարծում է նա։

Ըստ Խզմալյանի՝ Սարգսյանը կարող է կրկնել Վլադիմիր Պուտինի հնարքը և նախագահության երկրորդ ժամկետը լրանալուց հետո վարչապետ դառնալ, և մենք կունենանք ձայնազուրկ խորհրդարան, որը հեշտ է վախեցնել ու գնել։