Իսպանական Ալզիրա քաղաքը ճանաչեց Հայոց ցեղասպանությունը

Իսպանիայի Վալենսիայի մարզի Ալզիրա քաղաքը պաշտոնապես ճանաչեց Հայոց ցեղասպանությունը: Այս մասին «Հայերն այսօր»-ին հայտնում են Վալենսիայի «Արարատ» հայկական միությունից:

Նոյեմբերի 25-ին Ալզիրայի քաղխորհրդի նիստում բոլոր 5 կուսակցությունները միաձայն կողմ քվեարկեցին Արարատ հայկական միության ներկայացրած բանաձևին՝ 20-րդ դարի առաջին սպանդը որակելով ցեղասպանություն եզրույթով և դատապարտելով Թուրքիայի ժխտողական քաղաքականությունը:

Նախօրեին տեղի ունեցած հանդիպման ժամանակ, քաղաքապետ Դիեգո Գոմեսը հայկական միության ներկայացուցիչներին խոստացավ՝ բանաձևը հասցնել այլ կառավարություններին և հատկապես՝ Վալենսիայի և Իսպանիայի խորհրդարաններ:

Ալզիրան դարձավ Իսպանիայի թագավորության 12-րդ քաղաքը, որը ճանաչեց Հայոց ցեղասպանությունը: