Ալյուրը ֆոլաթթվով հարստացնելու հերթական «խերը»` օստեոպորոզ

Առողջապահության համաշխարհային կազմակերպության տվյալներով` օստեոպորոզը պրոգրեսիվ աճող հիվանդությունների թվին է դասվում, այն 21-րդ դարի ամենավտանգավոր հիվանդությունն է համարվել: Այս մասին լրագրողներին հայտնեց կենսաբան Դոլորես Ղափանցյանը:

Նա նշեց, որ օստեոպորոզը ոսկրամկանային համակարգի քրոնիկ զարգացող հիվանդություն է, այսինքն` ոսկրանյութի խտության պակասի հետևանքով  ոսկորները թուլանում են:

«Ուշագրավ է, որ Հայաստանում բացարձակապես չկան տվյալներ օստեոպորոզի հետ կապված: Ալյուրի հարստացումը ֆոլաթթվով կհանգեցնի օստեոպորոզով հիվանդների թվի աճի, քանի որ օրգանիզմում ցինկի ու երկաթի պակասն իբրև թե փորձում են լրացնել` հացը ֆոլաթթվով հարստացնելով, սակայն կալցիումն ու երկաթը հակադիր տարրեր են, և նրանք խանգարում են իրար` օրգանիզմում տարրալուծվելու»,- ասաց կենսաբանը:

Նա նշեց, որ եթե երկաթը չի մարսվում, երկաթի կուտակումն օրգանիզմում հանգեցնում  է մի շարք հիվանդությունների: «Օրինակ` եթե մարդուն տալիս ենք ֆոլաթթվով հարստացած հաց և շիլա, կալցիումն ու երկաթը հակադրության մեջ են մտնում իրար հետ, և արդյունքում` ոչ մեկը չի մարսվում, իսկ սա կարող է օստեոպորոզի հիմք հանդիսանալ»,- ասաց Ղափանցյանը: