Արմեն Մուրադյանն այցելել է Մոսկվայում վիրահատված տուժածին. նրա վիճակը կայուն ծանր է

ՀՀ առողջապահության նախարար Արմեն Մուրադյանն այցելել է Մոսկվա-Երևան երթուղու ուղևորատար ավտոբուսի վթարից տուժած՝ Մոսկվայի Սկլիֆոսովսկու անվան շտապօգնության քաղաքային գիտահետազոտական ինստիտուտում նեղ մասնագիտական բժշկական օգնություն ստացող տուժածին: Նախարարը հետաքրքրվել է հիվանդի բուժման վարման ընթացքով, զրուցել նրա հետ: Հայաստանից ժամանած բժիշկները ռուս մասնագետների հետ քննարկել են հիվանդի բուժման ռազմավարությունը և հետագա քայլերը: 

Հիշեցնենք, որ տուժածն ուներ կոնքոսկրերի և անրակի կոտրվածքներ: Նրան նոյեմբերի 9-ին վիրահատել էին, վիրահատությունը հաջող էր անցել: Բժիշկներն այս պահին նրա առողջական վիճակը գնահատում են կայուն ծանր:

Նշենք, որ Հայ-ռուսական առողջապահական երկրորդ համաժողովի շրջանակում Արմեն Մուրադյանի գլխավորած պատվիրակությունը ծանոթացել է Դ. Ռոգաչովի անվան արյունաբանության, ուռուցքաբանության և իմունաբանության ֆեդերալ գիտակլինիկական և ՌԴ Մոսկվայի Վ.Ի.Կուլակովի անվան Մանկաբարձության, գինեկոլոգիայի և պերինատոլոգիայի գիտական կենտրոնների նյութատեխնիկական հնարավորություններին և բժշկական ծառայությունների տեսակներին: Ուրվագծվել են համագործակցության հեռանկարները: