1273 ծառ է ապօրինի հատվել. ապօրինի ծառահատումների թիվն ավելանում է

Տարին դեռ չի ավարտվել, սակայն այս տարի արդեն 1273 ծառ է ապօրինի հատվել, որը 210-ով ավելի է, քան 2014-ին. այսօր լրագրողներին հայտնեց «Հայանտառ» ՊՈԱԿ–ի տնօրեն Մարտուն Մաթևոսյանը:

Նա նշեց, որ 2013-ին էլ ապօրինի ծառահատումների թիվը եղել է 928-ը, ստացվում է` ծառահատումների թիվն աճման միտում ունի:

«Սա պայմանավորված է այն հանգամանքով, որ փափուկ փայտանյութի տրամադրումը նվազել է: Մյուս կողմից՝ 2004-ին ծառահատումների թիվը 32 160-ն էր, և այս ցուցանիշի նվազումն էլ գազաֆիկացման աշխատանքների արդյունքն է»,- ասաց Մաթևոսյանը:

Նա տեղեկացրեց նաև, որ 1 անտառապահը 500-600 հա տարածք է հսկում, սակայն անտառապահով հարց չի լուծվի: «Ապօրինի հատումները ծնող պատճառները պետք է վերացնել, ոչ թե յուրաքանչյուր 10 հա մեկ անտառապահ դնել: Սահմանամերձ և անտառամերձ համայնքներում հիմնական վառելիքը փայտն է, և մենք հիմա վարչապետից հանձնարարական ունենք, որ այդ համայնքներում ծառահատումներն այլ դաշտ մտնեն. մենք պետք է մարդկանց սովորեցնենք` ինչպես անտառին մինիմալ վնաս տալով վառելափայտ ստանալ: Նման փորձ Վրաստանն ունի, որը հաջողվել է»,- ասաց Մաթևոսյանը:

Ի դեպ, 2015-ին 175 հա անտառվերականգնման աշխատանքներ են կատարվել: