Լոնդոնում հայկական կոնյակը վաճառվել է ավելի քան 120.000 ԱՄՆ դոլարով

70 տարվա հնեցման հայկական «Արարատ» կոնյակը Միացյալ Թագավորության վարչապետ Ուինսթոն Չերչիլիի մահվան 50-րդ տարելիցին նվիրված՝ Լոնդոնի աճուրդում վաճառվել է ավելի քան 120 հազար ԱՄՆ դոլարով:

Asbarez-ը տեղեկացնում է, որ աճուրդը հովանավորել է Մոնակոյի արքայազն Ալբերտ 2-րդը, իսկ կազմակերպչական աշխատանքները հովանավորել են Բրիտանիայում Մոնակոյի դեսպան Էվելին Ջենթանը, Հայաստանի դեսպան Արմեն Սարգսյանն ու Սաուդյան արքայազն ալ Վալիդը:

Աճուրդում վաճառվել են Չերչիլի նախընտրած խմիչքները, ծխախոտները, հագուստներն ու զանազան այլ իրեր:

Աճուրդի ժամանակ մեծ հետաքրքրություն է եղել հայկական կոնյակի նկատմամբ: Վաճառքից ստացված գումարն օգտագործվելու է կենսաբազմազանության պահպանման, կլիմայի փոփոխության  և անապատացման դեմ պայքարի նպատակներով: