4-ամյա երեխայի մահվան մեջ մեղադրվող բժիշկը հեռացվել է պաշտոնից, բայց ոչ` աշխատանքից

Արմավիրի բժշկական կենտրոնի ինֆեկցիոն բաժանմունքի վարիչ Անահիտ Պետրոսյանն ազատվել է վարիչի պաշտոնից:

Yerkir.am-ի հետ զրույցում Արմավիրի բժշկական կենտրոնի տնօրեն Սարգիս Խաչատրյանը նշեց, որ Պետրոսյանին ազատել է պաշտոնից` քրեական գործի հետ կապված: «Քննչականից գրություն եկավ, որ Պետրոսյանին պաշտոնից պետք է ազատել՝ գործի հետագա քննության համար: Սակայն նա շարունակում է աշխատել մեզ մոտ` որպես բժշկուհի»,- ասաց տնօրենը:

Հիշեցնենք, որ 4-ամյա երեխայի մահվան գործով մեղադրանք էր առաջադրվել Պետրոսյանին: yerkir.am_ի հետ զրույցում երեխայի ծնողներն ասել էին, որ պետք է գնան մինչև վերջ և հասնեն նրան, որպեսզի մեղավորը` Պետրոսյանը, պատժվի, իսկ բժիշկն, իր հերթին, նշել էր, որ իրեն մեղավոր չի համարում: