Մինուս 4 տոկոս տնտեսական աճ գրանցած երկրների համեմատ՝ 2,2 տոկոսը «քռքաշ» ցուցանիշ չէ. ֆինանսների փոխնախարար

Այսօր ԱԺ-ում քննարկվում է 2016թ. բյուջեի նախագիծը:

ԱԺ պատգամավոր Խաչատուր Քոքոբելյանը հարց ուղղեց հիմնական զեկուցող՝ ֆինանսների փոխնախարար Պավել Սաֆարյանին՝ միաժամանակ ասելով, որ, հասկանալով, թե ինչ տխուր ցուցանիշներ է ներկայացնում կառավարությունը, մարդու հարց տալն էլ չի գալիս: Պատգամավորը հարցրեց, թե որքա՞ն գումար է հատկացվել սահմանամերձ համայնքներում ապաստարաններ կառուցելու ու հակակարկտային կայանքներ տեղադրելու համար: «Բայց լավ կլիներ, որ ի սկզբանե ասվեր, որ սա քռքաշ վիճակ է, որ այլընտրանք չունեք»,- ասաց պատգմավորը:

Պավել Սաֆարյանը չհամաձայնեց «քռքաշ»-ի հետ՝ ասելով, որ ամեն ինչ պետք է նայել համեմատության մեջ: «Չենք կարող ոչ իրական տնտեսական աճի ցուցանիշներ գրել ու հիանալ: Մենք իրատեսական ենք գրել՝ 2,2 տոկոս: Կան երկրներ, որտեղ տնտեսական աճը մինուս 4 է, հիմա քռքաշը ո՞րն է՝ 2,2-ը, թե՞ մինուս 4-ը: Եթե համեմատենք մինուս գրանցած երկրների հետ, մենք շատ լավ վիճակում ենք»,- ասաց ֆինանսների փոխնախարարը:

Նա հավելեց, որ հակակարկտային կայանքների համար գումարներ չեն նախատեսվել: