Քաղաքապետարանի վարչության պետի կողմից մահվան հանգեցրած վրաերթից անցել է 40 օր. փորձաքննության պատասխանները չեն ստացվել

Մոտ 40 օր է անցել Երևանի քաղաքապետարանի առևտրի վարչության պետ Արման Եդոյանի կողմից Ռուբինյանց փողոցի թիվ 20 շենքի դիմաց հետիոտնին վրաերթի ենթարկելու դեպքից: Նշենք, որ Արման Եդոյանն այս գործով վկայի կարգավիճակում է: Դեպքի առթիվ նշանակված` դիակի դատաբժշկական, համալիր՝ դատահետքաբանական, դատաքիմիական և մանրաթելային, ինչպես նաև դատաավտոտեխնիկական փորձաքննության արդյունքները ստանալուց հետո միայն պարզ կդառնա՝ արդյո՞ք Եդոյանը մեղավոր է, թե՞ ոչ:

Այս կապակցությամբ yerkir.am-ը գրավոր հարցում էր ուղարկել ՀՀ քննչական կոմիտե: Ի պատասպան մեր հարցմանը, կոմիտեից հայտնել են, որ քրեական գործով նշանակված փորձաքննությունների եզրակացությունները դեռևս չեն ստացվել:

Հիշեցնենք, որ վրաերթի հետևանքով տեղում մահացել էր 53-ամյա Խ. Մկրտչյանը: Դեպքի առթիվ հարուցվել է քրեական գործ՝ ՀՀ քրեական օրենսգրքի 242-րդ հոդվածի 2-րդ մասով: Նախաքննությունը շարունակվում է: