ԿԸՀ-ն հաստատեց հանրաքվեի նախապատրաստման և անցկացման հիմնական միջոցառումների ժամանակացույցը

ՀՀ հանրաքվեի կենտրոնական հանձնաժողովն այսօր գումարել է իր առաջին նիստը: Հանրաքվեի կենտրոնական հանձնաժողովի նախագահ Տիգրան Մուկուչյանը նախքան նիստի օրակարգին անցնելը տեղեկացրել է, որ հանրաքվեի կենտրոնական և ընտրատարածքային հանձնաժողովներն են Հայաստանի Հանրապետության ընտրական օրենսգրքով սահմանված կարգով կազմավորված համապատասխան ընտրական հանձնաժողովները: Հանրաքվեի կենտրոնական հանձնաժողովի լիազորություններն իրականացնում է Հայաստանի Հանրապետության ընտրական օրենսգրքով սահմանված կարգով ստեղծված կենտրոնական ընտրական հանձնաժողովը:

Արտահերթ նիստում հանրաքվեի կենտրոնական հանձնաժողովը հաստատել է 2015 թվականի դեկտեմբերի 6-ի ՀՀ Սահմանադրությունում փոփոխությունների հանրաքվեի նախապատրաստման և անցկացման հիմնական միջոցառումների ժամանակացույցը: