Լևոն Արոնյանը շախմատային սեանս անցկացրեց 22 հաշմանդամ երեխաների հետ

Տիգրան Պետրոսյանի անվան շախմատի տանն այսօր տեղի ունեցավ արդեն ավանդույթ դարձած` «Սպորտը` հանուն հավասար հնարավորությունների» շախմատային սեանսը` Լևոն Արոնյանի մասնակցությամբ:

Հայ գրոսմայստերը  սեանս անցկացրեց Երևանի ներառական կրթություն իրականացնող դպրոցների 22 հաշմանդամ աշակերտի հետ:

«Կարևորում եմ, որ սպորտում մարդկանց մեջ տարբերություն չլինի, և բոլորը  հավասար լինեն:  Կարծում եմ` շախմատն այն խաղն է, որը մարդ պետք է հոգով խաղա: Քանի որ այս երեխաները դժվարություններ ունեն կյանքում, համոզված եմ, որ, հաղթահարելով այդ դժվարությունները, նրանք կկարողանան գտնել իրենց աշխարհը, հնարավոր է` նաև շախմատում»,- լրագրողների հետ զրույցում ասաց Արոնյանը:

Հիշեցնենք, որ միջոցառումն իրականացնում են «Հույսի կամուրջ» և «Առաքելություն Արևելք» կազմակերպությունները (Դանիայի արտաքին գործերի նախարության ֆինանսական աջակցությամբ):